JUST ME AND ME AGAIN

Monday, November 8, 2010

KENANGAN RUMAH ASAP

     Satu potang,sodang den duduk temonung dopan roban ayam Suman Debet,den tetibo yo teringek balik kesah lamo2 dulu maso den kojo sentri kek Ladang Gadesh nun....Cerito neh tontang kawan baik den yang sesamo kojo dongan den.Namo manjo eh Buragas,namo boto eh den dah lupo.Cerito eh tak la best bona tuk di pilemkan,tapi boleh la layan...Maso tu den ngan dio mudo belio lagi.Bolom kawin.Bujang jareh bak kato orang nogori smilan.Umo tongah nak naik.Darah tongah paneh.Pantang sobut,jadi....

     Cerito eh macam ni,den duo orang kojo kek ladang.Jadi jaga.Duduk pun kek ladang tu lah.Ado pehak ladang sediokan rumah.Tapi kalau korang tengok,tak do rupo rumah pun.Rupo bangsal adolah.Lobih topat lai rumah asap.Ekau tau tak rumah asap tu apo?rumah asap tu tompek nyidai gotah koping.Ekau bayangkan lah den duduk serumah dongan gotah koping.Den yo yang tau macam mano azab eh.Mulo2 duduk kek situ,den tak dapek nak lolap an mato.Selero makan den pun ilang selamo 3 minggu.Bilo den mandi wangi,masuk 2 jam kang,badan den dah samo bau eh dongan gotah koping tu.Silap2 lobih lae.Tapi bilo dah lamo2,sumo tu den dah raso biaso yo,malah kalau den makan nasi,tak do bau gotah tu,tak beselero den jadi eh..Buragas pun samo macam den.Dio lagi parah,siap buek kain komban lagi gotah koping tu.

     Den dongan Buragas ni kojo samo syif.Den kojo malam,dio kojo malam.Dio kojo siang,den pun kojo siang.Jadi den sentiasolah bekopit kemano2.Cumo satu yo yang den polik dongan Buragas ni.Den selalu nengok dio ilang time subuh.,bilo tibo bulan puaso.Nak kato kan ko masjid semayang subuh,semayang lain tak ponah dibuek eh.Poso pun kekadang kantoi.Tiap kali den tanyo,mano dio poi subuh2 tu,dio jawab ado kojo sikit.Den tanyo,motong ko?Tak pulak kato eh.Den tanyo poi curik gotah buku ko?Tak jugo kato eh.Abih tu apo?Ado la,kato eh,rahsio...Hampeh,nak berahsio lak dongan den.Ingat undi pilihanrayo ko nak rahsio2.

     Hampir pertongahan poso dio buek paham macam tu,last2 dio mengaku jugo dongan den akhirnyo.Dio kato tiap kali dio hilang tu,dio poi buek projek.Den tanyo projek tanam semulo bekolompok ko?Tak,kato eh sedirian berhad.Hampir pitam den dibuek eh,bilo dio kato tiap kali dio ilang tu,dio poi ngondap anak daro mandi......Astaga,po dah tebiat kau ni.Nak mampuih ko.Buek eh kono tangkap,mau duduk jel 7,8 taun.Kato eh mulo2 dulu dio suko2 yo.Tapi bilo dah lamo2,dio jadi ketagih.Samo macam dio ketagih bau gotah koping....Macam2 dio cerito dongan den yang den raso tak manih tuk den tulih kan kek sini.Last2,Buragas ajak den poi samo buek projek.Kato eh rugi bosa kalau den tak ikut samo.Donga cerito dongan tengok sendiri tak samo.Siaran langsung kato eh.Akhirnyo den tepengaruh jugo dongan ajakan Buragas.

     Mako pado pagi esok eh,sebolom ayam jantan bekokok,den dongan Buragas,tolah berado dibelakang bilik mandi anak mandur ladang.Buragas suruh den carik lubang yang agak baik sikit.Kato eh wayang kulit ni kono tengok boto2.Kalau nampak sipi2 yo,buang maso dan tenago.Tak bebaloi langsung bejago pagi2 buto ni.....Dah dapek lubang yang baik den duduk diam2 kek situ,Kalau nyamuk gigit,Buragas suruh halalkan yo.Kalau ado ula lalu,pandang yo kato Buragas.

     Saat yang ditunggu pun tibo.Dari jauh den nampak cahayo lilin pelahan2 menuju ko bilik mandi.Hati den bedoba2.Antaro takut ngan kelahap....Makin lamo makin dokat cahayo lilin tu.Den lolap an mato.Gemuruh lak ati den.Maklum lah nak nengok daging montah.Den donga bunyi orang sidai kain.Pas tu donga bunyi orang siram air.Mandi la tu.Den nekad.Pelahan2 den bukak mato den.Alamakkkkkk...Hampeh....Bukan anak daro mandur yang mandi,tapi mandur porot buncit yang mandi...Anu eh boto2 dopan mato den.Adoi...apo punyo suwey...Den nak lari tak boleh.Kang dio dongar lak.Nak lolap an mato,tak telolap an lagi dah...Jadi den tengok yo lah wayang kulit free,betajuk mandur porot buncit mandi telanjang...hampeh....Sakit jiwo den,punyo lah lamo dio mandi.Naik kobeh kaki den.Nasib baik tak jem.....

     Penyudah eh den tobat,tak nak buek kojo gilo tu lagi.Nasib baik mandur porot buncit yang datang,kalau ula sawo yang datang,tak pasal2 den masuk surat kaba tamil muko dopan,seorang pekerja ladang mati dibaham ular sawa.......Tak den buek lae dah kojo bangang tu...tobat..tobat..Setolah 4 jam Buragas golak kan den,dio pun pocah lubang,kato eh,selamo ni pun dio selalu bona kono macam tu.Lain ditunggu,lain yang datang...Sumo tu kiro nasib le katonyo...Hampeh...Hampeh...Kalau ekau cerito boto2 semalam,Haram tak ingin den ikut.Tak pasal2 den tak poso ari ni garo2 sahur belakang bilik air mandur porot buncit....Hampehhhh......Buragas torus golakkan den sampai kua air mato sambe guling2 dalam rumah asap.......

    Bukkkk!Sebijik buah kelapo gomeng,gugur sebolah den...Nyarih kepalo den dihimpap eh.Lamunan den pun terhonti.Den sonyum sorang2 bilo ingatkan Buragas.Tah apo koba ekau sekarang neh.Berapo cucu ekau sekarang.Ontah idup ontah ko tidak lae..Buragas,Buragas.......Rosak den kekawan dongan ekau.....