JUST ME AND ME AGAIN

Wednesday, April 20, 2011

JANGAN TANYO DEN KENAPO...

Kalau den tau pasai ekau lamo dulu...
Lamo dah den lupo an...

Kalau den tau ekau tak donga cakap...
Lamo dah den korek telingo ekau...

Kalau den tau ekau banyak mulut...
Lamo dah den cili an...

Kalau den tau ekau kaki busuk...
Lamo dah den koting an...

Kalau den tau ekau tangan panjang...
Lamo dah den putuih an...

Kalau den tau ekau bega...
Lamo dah den belangkung...

Tapi nak kato apo...
Den telopeh pandang sumo tu...
La ni tak dapek den nak nolong...
Raso-raso ekau kuek bona...
Ekau terojon yo dalam gaung nun...

Tapi kalau den dah tau pasai ekau sekarang...
Napo den masih teringek-ingek...

Kalau den dah tau ekau telingo pokak...
Napo den tak bechating dongan ekau...

Kalau den dah tau mulut ekau melampuh...
Napo den tak sumbek an dongan kain...

Kalau den dah tau kaki ekau bebau...
Napo den masih pinjam kasut ekau...

Kalau den dah tau ekau panjang tangan...
Napo den tak suruh ekau rompak kodai omeh...

Kalau den dah tau ekau bega bona...
Napo den nak nasihat an ekau lae...

Agak-agak den ni boto ko tidak...
Kadang-kadang raso den pulak yang bangang...
Bongap pun ado...Badigol pun ado...
Ado lobih baik den lupo an ajo...

Tapi kan kadang-kadang tu ado yo baiknyo den kona ngan ekau...
Sosak den tongah bulan,dapek yo numpang meggi semangkuk...

Telingo ekau yang pokak tu,sonang den nak ngutuk sepam duo...

Mulut ekau yang banyak tu,sonang lak nak ngusha awek dopan umah...

Kaki ekau yang busuk tu,buleh yo alau kaum yang tak paham-paham nak berambus bilo betandang kek umah den ni...

Tangan ekau yang panjang tu,sonang-sonang yo jolok lubang jamban den yang tesumbek...

Tapi bab bega ni...Dah lotih den...

Bolom ponah den nengok ekau poi gotong royong kek balairayo...Bolom ponah den nengok ekau tolong den komeh umah...Bolom ponah den nengok ekau boli barang dapur...Bolom ponah den nengok ekau sapu sampah kek laman...Bolom ponah den nengok ekau isik minyak moto...Bolom ponah den nengok ekau mandi pagi....

Tapi kan...Tak tau lah macam mano den nak kato...

Bega-bega ekau pun,bolom ponah den nengok ekau abaikan omak ngan abah ekau kek kampung...Bolom ponah den  nengok ekau tinggi an suaro kek orang tuo...Bolom ponah den nengok ekau mintak sedokah kek den...Bolom ponah den nengok ekau ngisap dadah...Bolom ponah den nengok ekau minum arak...Bolom ponah den nengok ekau main judi...Bolom ponah den nengok ekau merempit...Bolom ponah den nengok ekau larikan anak daro orang...Dan yang satu ni...boto-boto den respek...Den bolom ponah nengok ekau tingga an sembahyang limo waktu...

Apo lae den nak kato...?

Den bagi la ekau limo bintang...

Dan kalau ekau donga apo yang den cakap ni...

Den nak mintak maap...Den tak sengajo tebuang stokin busuk ekau...Cukup-cukup la merajuk ekau tu...sok den boli an yang baru...Ekau pakai bona lah...


moral / jangan malas basuh stokin.nanti ilang kawan...

Hampeh.....